अरूण राईको उपचारमा सहयोगका लागि आग्रह (Bhutanese News)

सामाजिक सेवामा सकृय भुटानी शरणार्थी युवा अरूण राईको उपचारमा सहयोग गर्न बरिष्ठ भुटानी चिकित्सक तथा अधिकारवादी नेता डा. भम्पा राईले आग्रह गरेका छन् ।
गम्भीर अवस्थामा काठमाण्डौमा उपचार गराइरहेका अरूण श्वासप्रश्वासको समस्याबाट पिडीत छन् । डा. राईका अनुसार विरामी अरूणको उपचारका लागि हालसम्म ३ लाख रूपैयाँभन्दा बढि खर्च भइसकेको छ । अत्यन्त न्यून आय भएका पिडीत राईको उपचारका लागि अहिले दैनिक २५ हजार रूपैयाँ खर्च भइरहेको छ ।
यसअघि मधुमेहबाट पिडीत राई सो रोग नियन्त्रण भएसँगै श्वास रोगबाट पिडीत भइ अस्पताल भर्ना भएका हुन् । उनको धरानस्थित विपि कोइराला स्वास्थ्य विज्ञान प्रतिष्ठान, सिलिगुढी स्थित मित्र नर्सिङ होम हुँदै हाल काठमाण्डौस्थित वयोध्या अस्पतालमा उपचार भइरहेको परिवारले जनाएको छ । स्पाइनल कर्डमा समस्या देखिएका उनको शल्यकृया गर्नु पर्ने चिकित्सकहरूको भनाइ छ । शल्यकृया अगाडी २४ सै घण्टा अक्सिजन दिनु पर्ने र एकै सेकेण्ड पनि सो नगरिएको ज्यान जोखिममा पर्नसक्ने उनको उपचारमा संलग्न चिकित्सकहरूलाई उदृत गर्दै डा. राईले जानकारी दिए ।

डा. राईका अनुसार पिडीत राईको उपचारका लागि साथी शुभचिन्तकहरूबाट केही मात्रामा सहयोग प्राप्त भइरहेको भए पनि सो अपुग भएकाले थप सहयोग आवश्यक छ ।
भुटान विद्यार्थी संघ (SUB) का पूर्व कोषाध्यक्ष समेत रहेका राई हाल आम्दाको प्राथमिक स्वास्थ्य उपचार परियोजना (PHCP) अन्तर्गत शरणार्थी प्रभावित क्षेत्रमा कार्यरत छन् ।
४६ बर्षीय पिडीत राईका श्रीमती र एक छोरा छन् ।